جريمة الناس إنو تعودت عالعيشه بجهنم!: شدّة سيفون الحمام ب10 آلاف ليرة

/سمير سكاف_الرائد نيوز/

رح تتعود الناس تشتري ربطة الخبز بأكتر من 50.000 ليرة مع ارتفاع سعر المازوت!

تعودت الناس إنو الدولار صار بنحو 40.000 ليرة! وشادد طلوع لل 200.000 ليرة!

رح تبلش الناس تتعود تدفع اشتراك الكهربا بالدولار وعالعالي! بلشو ببعض المناطق.

رح تبلش الناس تتعود إنو تنكة البنزين رح تصير فوق المليون ليرة. وقريباً بتدفعها بالدولار! ونفس الشي للمازوت ولجرة الغاز.

رح تتعود الناس قريباً إنو ميّة الصهريج رح تصير ب 500.000 ليرة ال 1.000 ليتر! وبالتواليت، شدة السيفون بتصير ب 10.000 ليرة!

تعودت الناس تدفع الدوا بالدولار أو أكتر من 30 ضعف سعرو الأساسي! ورح تتعود عالموت عا باب المستشفى!

تروضت الناس على سرقة رصيدها بالموبايل وما حكيت!

رح تتعود الناس على فواتير انترنت كبيره وانترنت ضعيف وعا فواتير كهربا كبيره وكهربا ما في!

تعودت الناس تعيش بحارة كل مين إيدو إلو، وإنو محاكم ما في، وإنو التحقيق بتفجير المرفأ… بح!

طبعاً بهيدي الظروف، الناس رح تعمل مجازر… على الواتساب!

اترك رد إلغاء الرد